Kryeministri Albin Kurti ka vendosur sot ta pezullojë nga puna drejtorin e Përgjithshëm të Institutit të Kosovës për Administratë Publike, Hysen Muzliukajn. Sipas vendimit të publikuar në Gazetën Zyrtare, ky hap vjen pas ngritjes së aktakuzës ndaj tij për kryerje të veprës penale gjatë ushtrimit të funksioneve të tij zyrtare.
Pezullimi i Muzliukajt, i cili këtë pozitë e ushtronte që nga emërimi i 1 gushtit të vitit 2025, do të zgjasë deri në përfundimin e plotë të procedurës penale. Gjatë kësaj periudhe, ai do të përfitojë 50 për qind të pagës së tij të plotë.
Vendimi i sotëm për pezullim vjen rreth një muaj pasi Kryeministri Kurti e kishte emëruar të njëjtin person në një tjetër pozitë me rëndësi. Më 12 gusht të vitit 2026, me vendim të Qeverisë, Kurti e kishte emëruar Muzliukajn si kryesues të Komisionit të Pranimit për përzgjedhjen e Drejtorit Ekzekutiv të Agjencisë Qendrore të Prokurimit (AQP), pavarësisht se edhe në atë kohë Gjykata e Apelit e kishte vërtetuar aktvendimin për konfirmimin e aktakuzës ndaj tij për keqpërdorim të detyrës zyrtare.
Muzliukaj, i njohur si ish-këshilltar politik i ish-ministrit të Bujqësisë, Faton Peci, dhe ish-drejtor komunal në Mitrovicë gjatë mandatit të Agim Bahtirit, ishte arrestuar në korrik të vitit 2023 nga Prokuroria Speciale, së bashku me ish-nënkryetarin e Mitrovicës, Faruk Mujkën.
Në atë kohë, Prokuroria kishte njoftuar se ndaj Muzliukajt ishte lëshuar urdhër për bastisjen e banesës, ndërsa ai u lirua një ditë pas arrestimit për t’u mbrojtur në liri.
Sipas aktakuzës, Muzliukaj, në cilësinë e ish-drejtorit për Gjeodezi, Kadastër dhe Pronë në Komunën e Mitrovicës, akuzohet për keqpërdorim të detyrës zyrtare në lidhje me rastin e këmbimit të pronës së ish-Bankosit me pronë private.
