Kryeministri i Kosovës, Albin Kurti, ka përkujtuar aktivistin Xhavit Haziri, në 28-vjetorin e zhdukjes së tij.
Kurti ka bërë homazhe pranë shtatores së Hazirit në Obiliq, duke rikujtuar rrethanat e zhdukjes së tij më 17 shtator 1998 dhe veprimtarinë e tij politike e patriotike.
Sipas Kurtit, Haziri ishte rrëmbyer nga persona që ai i identifikoi si pjesëtarë të shërbimit të fshehtë serb, teksa po kalonte pranë Xhamisë së Llapit në Prishtinë. Ai tha se dëshmitarët kishin deklaruar se Haziri ishte futur në një automjet “Golf” të bardhë, i cili më pas kishte lëvizur në drejtim të Medresesë së Prishtinës.
“28 vite më parë, aktivisti i shquar Xhavit Haziri, u rrëmbye nga autoritetet e sigurisë së Serbisë dhe u zhduk dhunshëm, duke ngelur i pagjetur që nga atëherë”, ka shkruar Kurti.
Haziri, me origjinë nga Druari i Vushtrrisë, ishte shkolluar në Obiliq dhe kishte përfunduar studimet për drejtësi në Universitetin e Prishtinës. Sipas Kurtit, ai ishte angazhuar në veprimtari politike pas demonstratave të vitit 1981 dhe kishte vuajtur dënim me burg nga viti 1986 deri më 1990.
Pas lirimit, Haziri vazhdoi angazhimin në Lëvizjen Popullore të Kosovës dhe më pas në Ushtrinë Çlirimtare të Kosovës.
Kurti tha se familjarët e kishin raportuar zhdukjen e tij më 21 shtator 1998, ndërsa Haziri vazhdon të jetë i pagjetur.
Në përmbyllje, kryeministri e cilësoi Hazirin “hero të Kosovës dhe dëshmor të lirisë”, duke shprehur nderimin për veprën dhe kujtimin e tij.
