Gani Geci ka reaguar pas shpalljes së aktgjykimit në Hagë, duke falënderuar një varg figurash të njohura të UÇK-së dhe veçuar Rexhep Selimin e Jakup Krasniqin, për të cilët tha se gjatë procesit gjyqësor “e thanë të vërtetën”. Në fund të reagimit, ai i ka drejtuar një kërkesë të drejtpërdrejtë kryeministrit Albin Kurti.
Gani Geci ka publikuar një reagim pas zhvillimeve të sotme në Dhomat e Specializuara në Hagë, duke rikthyer në vëmendje debatin rreth Komunikatës nr. 59 dhe pretendimet se ndaj tij dhe familjes së tij ishte zhvilluar një “luftë speciale”.
Në reagimin e tij, Geci ka falënderuar familjen Jashari, Bashkim Jasharin, Sami Lushtakun, familjen Kodra, Nuradin Lushtakun, Sylejman Selimin, Jetullah Gecin dhe ish-pjesëtarë të UÇK-së nga Prekazi e Llausha.
Ai ka veçuar posaçërisht Rexhep Selimin dhe Jakup Krasniqin, duke thënë se ata “në Hagë e thanë të vërtetën”. Geci ka falënderuar edhe gazetarin Milaim Zeka, të cilit ia atribuon kontributin në zbardhjen e çështjes së Komunikatës nr. 59.
Në fund të reagimit, ai i ka kërkuar kryeministrit Albin Kurti që ta fshijë një shkrim të publikuar në Facebook më 9 tetor 2024 dhe t’i kërkojë falje publike.
Geci nuk ka dhënë në këtë pjesë të reagimit hollësi të tjera për përmbajtjen e postimit të Kurtit, por kërkesën e ka lidhur me pretendimet e tij të mëhershme për Komunikatën nr. 59 dhe me atë që e cilëson si fushatë kundër tij dhe familjes së tij.
Komunikata nr. 59 ka qenë prej vitesh objekt debatesh dhe akuzash publike, ndërsa çështje që lidhen me hartimin, shpërndarjen dhe pasojat e komunikatave të kohës së luftës janë trajtuar edhe gjatë procesit gjyqësor në Hagë.
Megjithatë, deklaratat e Gecit paraqesin qëndrimin e tij dhe nuk duhet të interpretohen automatikisht si konstatime të aktgjykimit, pa u identifikuar pjesët konkrete të vendimit që trajtojnë këtë çështje.
Reagimi i plotë i Gani Gecit:
“Të dashur miq,
Falënderoj nga zemra familjen Jashari; aso kohe në Kosovë ishte vetëm Bashkim Jashari.
Falënderoj nga zemra komandantin e Zonës së Drenicës, Sami Lushtakun.
Falënderoj nga zemra familjen Kodra, konkretisht dëshmorin dhe komandantin, shokun e Adem Jasharit, Ilaz Kodrën, Zenun Kodrën dhe të gjithë ushtarët e Prekazit.
Falënderoj nga zemra shokun e komandantit Adem Jashari, Nuradin Lushtakun.
Falënderoj nga zemra komandantin e TMK-së dhe FSK-së, Sylejman Selimin.
Falënderoj nga zemra dajën e Adem Jasharit, Jetullah Gecin.
Dhe të gjithë ushtarët e fshatit Llaushë.
Falënderoj nga zemra, veçanërisht, Rexhep Selimin dhe Jakup Krasniqin, të cilët në Hagë e thanë të vërtetën.
Falënderoj nga zemra Sahit Jasharin dhe vëllezërit e tij.
Një falënderim i shkon gazetarit Milaim Zeka për kontributin e tij në zbardhjen e Komunikatës nr. 59.
Falënderoj të gjithë ushtarët e UÇK-së.
Falënderoj nga zemra të gjithë ata që ishin në anën e së drejtës, shokët dhe miqtë e mi që besuan në të vërtetën dhe në të drejtën e një ushtari të drejtë, i cili luftoi me zemër për lirinë e vendit të tij, pavarësisht luftës speciale që u përdor kundër meje dhe familjes sime.
Falënderoj nga zemra vëllezërit e mi dhe familjen time.
Falënderoj nga zemra Shtetet e Bashkuara të Amerikës, Anglinë, Gjermaninë, Italinë dhe Finlandën.
Kërkoj nga Kryeministri i Republikës së Kosovës, z. Albin Kurti, ta fshijë shkrimin e tij në Facebook të datës 09.10.2024 dhe të më kërkojë falje publike.”
