Qytetarët që udhëtojnë në autostradën “Rruga e Kombit” po shprehin pakënaqësi për gjendjen e një segmenti në zonën e Kolshit, ku, sipas raportimeve dhe pamjeve të publikuara, njëra korsi vijon të jetë e bllokuar prej javësh, ndërsa tarifa e kalimit mbetet e pandryshuar.
Përdoruesit e rrugës kritikojnë faktin se paguajnë tarifën e plotë të autostradës, ndërkohë që qarkullimi zhvillohet me kufizime dhe infrastruktura, sipas tyre, nuk ofron standardin që pritet nga një rrugë me pagesë.
Ankesat nuk ndalen vetëm te gjendja e korsisë. Shumë qytetarë shprehen të pakënaqur edhe me mënyrën e llogaritjes së pagesës për ata që paguajnë me euro, duke pretenduar se kursi i këmbimit i aplikuar është më i lartë se ai i tregut.
Deri më tani nuk ka një reagim publik nga kompania koncesionare apo autoritetet përgjegjëse lidhur me arsyet e bllokimit të korsisë, afatin e përfundimit të punimeve apo pretendimet e ngritura nga përdoruesit e rrugës.
Qytetarët kërkojnë që, për sa kohë autostrada është me pagesë, të garantohet mirëmbajtja, funksionaliteti i plotë i infrastrukturës dhe transparencë lidhur me tarifat që paguajnë çdo ditë.
