Bashkimi Evropian ka përsëritur thirrjen ndaj autoriteteve në Kosovë që të pezullojnë rrënimin e objekteve në veri të vendit deri në përfundimin e të gjitha procedurave gjyqësore.
BE-ja ka shprehur keqardhje që institucionet e Kosovës nuk i kanë përfillur thirrjet e mëhershme për ndaljen e këtyre rrënimeve, veçanërisht atyre që lidhen me objektet përreth Liqenit të Ujmanit.
Këtë e ka deklaruar në Bruksel, gjatë një konference për media, Annita Hiper, zëdhënëse e Bashkimit Evropian për Politikë të Jashtme dhe Siguri.
“Na vjen keq që rrënimi i shtëpive ka vazhduar, veçanërisht pasi ankesat lidhur me pronat janë ende në shqyrtim gjyqësor. BE-ja u bën thirrje institucioneve të Kosovës që të ndalin çdo shembje të mëtejme dhe të punojnë me banorët e prekur dhe autoritetet lokale për të gjetur një zgjidhje të qëndrueshme ligjore. Çdo hap në drejtim të kundërt, përfshirë edhe shembjet, duhet të pezullohet derisa gjykatat kompetente të nxjerrin vendimin përfundimtar lidhur me ankesat”, tha ajo zëdhënësja e BE-së.
