Kryeministri në detyrë, Albin Kurti, ka reaguar lidhur me nisjen e gërmimeve në fshatin Kalludër të Zubin Potokut, ku dyshohet se ndodhet një varrezë masive.
Përmes një postimi në platformën “X”, Kurti ka bërë të ditur se autoritetet e Kosovës kanë nisur gërmimet në një lokacion ku dyshohet se janë fshehur mbetjet mortore të 23 intelektualëve nga Mitrovica.
Sipas tij, në mesin e personave të zhdukur më 19 prill 1999 kishte mjekë, profesorë dhe aktivistë për të drejtat e njeriut.
Kurti ka theksuar se edhe më shumë se 25 vjet pas përfundimit të luftës, familjet e 1 mijë e 565 personave të zhdukur me dhunë, përfshirë mbi 100 fëmijë, vazhdojnë të jetojnë në ankth dhe pasiguri.
“Pengimi i vazhdueshëm nga Serbia i përpjekjeve për të zbardhur fatin e këtyre njerëzve të pafajshëm nuk do ta ndalë Republikën e Kosovës në kërkimin e së vërtetës dhe drejtësisë”, ka shkruar Kurti.
Ai ka shtuar se institucionet e Kosovës do të vazhdojnë përpjekjet për gjetjen e çdo personi të zhdukur, zbulimin e varrezave të fshehura dhe vënien para drejtësisë të personave përgjegjës.
Sipas Kurtit, synimi është që familjet e të zhdukurve të mund të gjejnë më në fund paqe dhe ngushëllim.
