Kryetari i Lidhjes Demokratike të Kosovës (LDK), Lumir Abdixhiku, ka reaguar pas kërkesës së një pjese të strukturave të partisë për mbajtjen e Kuvendit të LDK-së dhe shkarkimin e tij nga pozita e kryetarit.
Në një adresim publik, Abdixhiku ka bërë të ditur se janë deponuar 148 nënshkrime që kërkojnë mbajtjen e Kuvendit të LDK-së, ku do të shqyrtohej edhe pozita e tij si kryetar, por ka theksuar se këto nënshkrime ende nuk janë verifikuar.
Sipas tij, ky proces mund të ketë pasoja të mëdha për partinë dhe për vendin.
“Ky proces mund të na dëmtojë, të jetë i pariparueshëm nga brenda dhe ta lërë Kosovën pa institucione dhe potencialisht përballë zgjedhjeve të reja në vjeshtë”, ka deklaruar Abdixhiku.
Ai më tej ka kritikuar ata që, sipas tij, po e shtyjnë këtë nismë për interesa personale, duke thënë se LDK-ja duhet të mbetet një parti në shërbim të qytetarëve dhe jo e përqendruar në ambicie për poste drejtuese.
“Në vlerat e mia, LDK do duhej të sillej si shtëpi e interesave të qytetarëve, jo e apetiteve për kryetar e karrigen e kryetarit. Karrige që aq shumë e lakmojnë dhe aq pak e kuptojnë”, është shprehur Abdixhiku.
Ai ka shtuar se ata që e kërkojnë këtë ndryshim mund ta arrijnë qëllimin e tyre, por sipas tij, mënyra e ndjekur nuk po i shërben as partisë dhe as qytetarëve.
“Le ta arrijnë fundja, por kanë mundur ta bëjnë më me kujdes, jo për bashkëpunëtorë, por për popullin që sheh, që vëzhgon e dëshpërohet, por megjithatë vepron”, ka thënë Abdixhiku.
