Pastori amerikan Mark Burns, këshilltar joformal i presidentit të Shteteve të Bashkuara, Donald Trump, për çështje fetare, ka zhvilluar një vizitë në Manastirin e Deçanit gjatë qëndrimit të tij në Kosovë.
Gjatë vizitës, Burns u prit nga igumeni i manastirit, Sava Janjiq, i cili e njohu me historinë dhe rëndësinë kulturore e fetare të këtij monumenti mesjetar, të përfshirë në Listën e Trashëgimisë Botërore të UNESCO-s.
Një ditë më parë, pastori amerikan vizitoi edhe Patriarkanën e Pejës, në shoqërinë e patriarkut të Kishës Ortodokse Serbe, Porfirije.
Përmes një postimi në rrjetin social X, Burns theksoi se vizita e tij synon të promovojë dialogun dhe mirëkuptimin.
“Nuk kam ardhur për të thelluar ndarjet. Kam ardhur të dëgjoj, të lutem dhe të mbështes paqen, pajtimin dhe shërimin në mbarë Kosovën dhe Ballkanin. Zoti e bekoftë çdo familje, çdo kishë, çdo manastir dhe çdo komunitet që përpiqet të jetojë në paqe”, shkroi ai.
Vizita e Burnsit rikthen në vëmendje edhe angazhimet e përfshira në Marrëveshjen e Uashingtonit të vitit 2020 ndërmjet Kosovës dhe Serbisë, ku palët u zotuan të respektojnë liritë fetare, të mbrojnë objektet e kultit dhe të inkurajojnë dialogun ndërfetar si pjesë e procesit të normalizimit të marrëdhënieve.
