Presidenti rus, Vladimir Putin ka investuar miliarda dollarë rusë në eksperimente ambicioze për zgjatjen e jetës së njeriut, por disa kritikë mbeten skeptikë nëse kjo e ashtuquajtur shkencë ka bazë reale.
Putin, 73 vjeç, ka ndarë të paktën 26 miliardë dollarë për kërkime shtetërore, përfshirë zhvillimin e ilaçeve të terapisë gjenetike që synojnë të ngadalësojnë plakjen qelizore, në kuadër të një projekti të quajtur “Teknologjitë e Reja për Ruajtjen e Shëndetit”, raportoi Wall Street Journal.
Ky ilaç “përfaqëson një nga rrugët më premtuese në luftën kundër plakjes”, deklaroi në prill zëvendësministri rus i Shkencës, Denis Sekirinsky. Megjithatë, ai është vetëm një nga shumë projektet për jetëgjatësinë që Putin ka promovuar në kuadër të një obsesioni disa dekadash, i cili sipas raportimeve ka nisur që kur ai ishte vetëm 16 vjeç, shkruan nypost.
Ndër projektet e tjera që Putin ka mbështetur janë rritja e organeve njerëzore brenda derrave për t’u transplantuar më pas te njerëzit, një procedurë e njohur si ksenotransplantim, si dhe printimi 3D i indeve të gjalla në një praktikë të quajtur bioprintim.
Shkencëtarët rusë të financuar nga shteti pretendojnë se kanë arritur të printojnë me sukses një gjëndër tiroide të miut dhe kërc njerëzor, ndërsa kanë deklaruar se deri në fund të kësaj dekade do të jenë në gjendje të printojnë organe të plota njerëzore për transplantim.
Këto projekte nuk janë thjesht eksperimente të shkencëtarëve që punojnë në fshehtësi. Vetë Putin e shpalli publikisht nismën në prill të vitit 2024 dhe premtoi se metoda të tilla do të kishin shpëtuar 175 mijë jetë deri në vitin 2030.
“Në Federatën Ruse po zhvillohet një gamë e tërë programesh shkencore në këtë fushë”, tha Kremlini për Wall Street Journal. “Këto projekte mbështeten nga shteti dhe në to marrin pjesë shumë institucione shkencore dhe kërkimore.”
Një nga figurat kryesore të kësaj nisme është vajza e vetë Putinit, endokrinologia 41-vjeçare Maria Vorontsova, e cila udhëheq projektet shtetërore të gjenetikës. Rol të rëndësishëm ka luajtur edhe fizikani i njohur rus Mikhail Kovalchuk, vëllai i të cilit, Yuri Kovalchuk, është financier dhe një aleat i afërt i Putinit.
“Është e vështirë të flitet për pavdekësinë, por aftësia për të riparuar njeriun pa dyshim do të rritet”, ka deklaruar Kovalchuk për mediat ruse, duke argumentuar se njerëzimi së shpejti do të jetë në gjendje të riparojë dhe zëvendësojë organet në mënyrë të vazhdueshme.
