Në Gjykatën Themelore të Ferizajt sot është mbajtur seanca për vrasjen e Bekim Varit, ku si i pandehur po dyshohet Leutrim Fejza. Përgjatë procesit gjyqësor, ku u morën në pyetje dëshmitarët e rastit, mbrojtja e të dyshuarit ngjalli dyshime lidhur me një deklaratë të njërit prej dëshmitarëve, i cili thotë se një person i kishte kërkuar të mos fliste për Varin, duke e cilësuar si rast të rëndë. Mbrojtja ka kërkuar që personi që është përmendur të ftohet si dëshmitar, kërkesë kjo e cila është miratuar sot nga gjykata.
Gjykata Themelore në Ferizaj ka marrë vendim që të thërrasë në cilësinë e dëshmitarëve G.Q dhe I.F pas dëshmive të dhëna nga katër dëshmitarë lidhur me rastin e Bekim Varit, trupi i të cilit u gjet në Pleshinë të Ferizajt, raporton Gazeta Insajderi.
Derisa dëshmitarët e parë rrëfyen momentet e dyshimta në kafene dhe lëvizjet e fundit të viktimës, mbrojtja e të dyshuarit Leutrim Fejza po insiston në marrjen në pyetje të personave që kishin dijeni të hershme për ngjarjen, duke tentuar të zbulojnë se kush i përhapi informacionet e para për krimin.
Saranda Keqekolli Sadiku, avokate e të dyshuarit Leutrim Fejza, ka kërkuar pranë trupit gjykues që G.Q, pasi që i njëjti i kishte thënë dëshmitarit P.R “shuj mos e përmend se është rast i rëndë”.
“Unë si mbrojtëse e të pandehurit Leutrim Fejza propozoj që në cilësi të dëshmitarit të ftohet G.Q nga fshati Pleshinë pasi që i njëjti i ka thënë dëshmitarit P.R “shuj mos e përmend se është rast i rëndë”, prandaj kërkojm që të sqarohet se nga kush e ka kuptuar G. dhe pse i ka thënë këto fjalë dëshmitarit P.R”, ka deklaruar avokatja.
Ky propozim u kundërshtua nga avokati i familjes së dëmtuar, Gazmend Rexhepi, të cilët e vlerësuan kërkesën si të parëndësishme për çështjen dhe si përpjekje për të zvarritur procesin penal.
“Mundohen ta degradojnë të ndjerin edhe moralisht me deklarime të pavërteta”, tha avokati Rexhepi para trupit gjykues.
Megjithatë, kërkesa e mbrojtjes së të akuzuarit u pranua.
Gazeta Insajderi ka arritur të sigurojë deklaratat në polici të njërit nga familjarëve të viktimës, përmes të cilës mësohet se të njëjtit janë paraqitur në stacionin policor rreth një javë prej herës së fundit prej që e kishin parë.
“Unë deklaroj se me 22.01.2025 rreth orës 17:00 me veturë xhip i bardhë ka ardhur te shtëpia dhe djali im Bekim Vari ka hyrur në xhip dhe kanë dalur nuk e di ku. Të nesërmen nipit tim i ka ardhur një mesazh ku shkruante se “jam nisur për në Gjermani”. Nga ky moment ne jemi përpiquur të kontaktojmë me të por nuk kemi arritur. Nipi tjetër ka pyetur shokët e tij dhe ka zbuluar se kanë pasur në plan të nisen bashkë 3 persona. I.C më ka thënë që nuk ka arritur të niset në munges të pasaportës kurse babai i B.XH më ka thënë që djali im është nisur, por është nisur vetëm dhe ka mbërritur në Zvicër. Të tjera informata nuk kemi”, kishte deklaruar familjari në polici.
Çka thotë aktakuza?
Prokuroria Themelore në Ferizaj ngriti aktakuzë për “Vrasje të rëndë” ndaj të pandehurit Leutrim Fejza, nën akuzën se ka privuar nga jeta në mënyrë dinake dhe mizore bashkëfshatarin e tij, Bekim Vari.
Sipas dosjes së Prokurorisë, plani kishte filluar një ditë para krimit, më 22 janar 2025. I akuzuari, së bashku me një person tjetër ende të paidentifikuar, kishin shkuar me një kamionetë të bardhë në shtëpinë e viktimës për ta marrë atë. Ata kishin vendosur të shkonin në një vilë (barakë) në malet e fshatit Burrnik, ku ishin furnizuar paraprakisht me ushqime. Pasi kishin qëndruar aty deri të nesërmen pasdite, rrugës duke u kthyer në këmbë nëpër mal, rruga ishte devijuar qëllimisht në drejtim të fshatit Manastirc, thotë organi akuzues.
Aktakuza pretendon se më 23 janar 2025, rreth orës 18:30 – 20:06, i akuzuari Leutrim Fejza ka shfrytëzuar armën që viktima e kishte me vete—një pushkë gjysmë-automatike (Kallashnikov)—duke e qëlluar atë pas koke dhe duke i shkaktuar plagë menjëherë vdekjeprurëse. Për të fshehur krimin, sipas Prokurorisë, i dyshuari e kishte mbuluar trupin e të ndjerit me dhe, drunj e dushk në mal.
Për të fshirë çdo gjurmë, i dyshuari, sipas Prokurorisë, kishte përdorur një shkrepëse për t’u vënë flakën gjërave personale të viktimës në vendin e ngjarjes. Për më tepër, vetëm disa minuta pas vrasjes, prokuroria pretendon se i dyshuari kishte marrë telefonin e viktimës dhe i kishte dërguar një mesazh mashtrues djalit të vëllait të të ndjerit, duke shkruar: “Bir, jam nis xermani me nji shok, m’subani merak, bor kallxoju”, me qëllim që të linte përshtypjen se Bekim Vari ishte nisur ilegalisht për në Gjermani.
Trupi i pajetë i Bekim Varit u gjet i dekompozuar vetëm më 5 shkurt 2025 nga disa qytetarë.
