Publicistja Kimete Berisha ka publikuar një shkrim satirik në Facebook, ku përmes formës së “librezës së notave” ka ironizuar presidenten Vjosa Osmani dhe kryeministrin Albin Kurti, duke i trajtuar si dy figura politike të vendosura në situata të ndryshme vetmie politike.
Në tekstin e saj, Berisha përdor nota simbolike për “popullaritetin”, “marrëdhëniet me aleatët”, “vetminë politike”, “qëndresën”, “kompromisin” dhe raportet me klasën politike, duke goditur me ironi të dy figurat kryesore të skenës politike.
Shkrimi, i ndërtuar në stil satirik dhe me gjuhë thumbuese, vjen në kohën kur debati politik për raportet mes institucioneve dhe bllokadën politike vazhdon të jetë në qendër të vëmendjes.
Postimi i plotë i Kimete Berishës:
Vetmi me eskortë dhe qëndresë në bankë
(Libreza e notave, sipas meje)
…
1. Vjosa Osmani
(viti shkollor: vetmi me eskortë)
…
Lënda: Popullaritet
Nota: në rënie
Ka pasur fillim premtues.
Më vonë, u vërtetua se duartrokitjet
ishin të huazuara.
…
Lënda: Mirësjellje me kalimtarë
Nota: 5
Përshëndet me zell.
Buzëqesh me disiplinë.
Fotografohet me të gjithë.
Edhe me njerëz që s’i njeh,
arrin të përqafohet
me përmallim.
…
Lënda: Marrëdhënie me aleatët
Nota: 1
Shokët e klasës
nuk e ftojnë më në grup.
Detyrat e përbashkëta kanë dështuar.
…
Lënda: Vetmi politike
Nota: 5+
Punon e vetme.
Nuk bashkëpunon.
Ka arritur rezultate të larta
në izolim institucional.
…
Lënda: Ndërtimtari
Nota: e shkëlqyer
Dallohet për aftësi të veçanta
në sektorin rezidencial.
Ka ndjekur nga afër
zhvillimet në terren.
…
Lënda: Amvisëri
Nota: 5 me yll
E vetmja në klasë
që i ka dy shtëpi
në lagjen e milionerëve.
…
Lënda: Aftësi për t’u dukur e sinqertë
Nota: 5
Bindëse.
Në raste të caktuara,
edhe publiku bindet.
…
Lënda: Shpërthime emocionale
Nota: 4
Reagon shpejt.
Mban ton të lartë.
Askush nuk e ka parë duke qarë.
…
Lënda: Përgjegjësi institucionale
Nota: në rishqyrtim
Komisioni e kërkoi.
Ajo ishte në një takim simbolik
me qytetarë të rastit,
duke e bërë shqiponjën me gishta,
dukshëm më saktë se Ilir Meta.
…
Lënda: Hakmarrje të shpejta
Nota: 5
Kap materien me shpejtësi.
Nuk humb kohë në teori.
…
Lënda: Telefonata
Nota: 1
E mban telefonin
më afër se këmishën.
Në gjendje gatishmërie,
pret një lajm
që nuk vjen.
Kur bie zilja,
shpesh raportohet
udhëtim qiellor.
…
Vërejtje e klasës:
Nxënësja ka aftësi të mira
për paraqitje publike,
por vuan nga mungesa
e dëshmitarëve të sinqertë.
…
Nënshkrimi i kujdestares së klasës:
Populli, përkohësisht.
…
Vërejtje:
Ka rrezik
që pasi ta ndjekë mësimin,
ta blejë shkollën.
…
2. Albin Kurti
(viti shkollor: i vetëm kundër të gjithëve)
…
Lënda: Durim
Nota: 5+
E ka ushtruar
në kushte laboratorike.
Ka qëndruar ulur
mes zhurmës kombëtare
pa e lëshuar bankën.
…
Lënda: Marrëdhënie me shokët e klasës
Nota: 1
Klasa është bashkuar kundër tij.
Fenomen i rrallë pedagogjik.
…
Lënda: Qëndresë
Nota: 5
Refuzon të dalë nga klasa
edhe kur i fikin dritat.
…
Lënda: Komunikim me ndërkombëtarët
Nota: e paqëndrueshme
Ndonjëherë flet
si nxënës shembullor.
Ndonjëherë
si mësues pa kontratë.
…
Lënda: Kokëfortësi
Nota: 5+
Shquhet në nivel kombëtar.
Komisioni u lodh.
Nxënësi jo.
…
Lënda: Vetmi politike
Nota: 5
Operon i vetëm.
Është i specializuar
në përballimin e vetmisë.
E krijon vetminë nga hiçi
dhe ka aftësi
ta shtrijë vetminë
prej këtu e deri në amshim.
…
Lënda: Amvisëri
Nota: mungon
Prej krejt klasës,
veç ky
s’ka shtëpi.
…
Lënda: Qëndrim në bankë
Nota: 5
Nuk çohet.
Edhe kur të gjithë bërtasin.
Sidomos atëherë.
…
Lënda: Marrëdhënie me mediat
Nota: konfliktuale
Të dyja palët pretendojnë
se po edukojnë njëra-tjetrën.
…
Lënda: Aftësi për t’u bërë fajtor universal
Nota: 5+
Shkëlqen pa përpjekje.
Përdoret
për çdo ushtrim kolektiv.
Edhe kur mungon.
…
Lënda: Kompromis
Nota: mungon
Arsyeja e mungesës:
parimore.
…
Vërejtje e klasës:
Nxënësi ka zgjedhur
të jetë i vetmuar,
ose klasa ka zgjedhur
ta lërë vetëm –
komisioni ende debaton.
…
Nënshkrimi i kujdestares së klasës:
Historia, me dorë të dridhur.
…
Vërejtje shtesë:
Klasa u bashkua kundër nxënësit,
sepse kur të gjithë
iknin nga mësimi,
ky rrinte në klasë.
…
P.S.
A thua
pse më vrau…
…
AUTOKRITIKË:
Ka dyshime të bazuara
se autorja
po hakmerret,
nuk po korrigjon.
