Një rast i rëndë i tentim-vrasjes në Vushtrri, që kishte mbetur pa të arrestuar për muaj të tërë, ka marrë zhvillim të ri – njëri nga të dyshuarit është ekstraduar nga Gjermania dhe tashmë ndodhet në duart e autoriteteve të Kosovës.
Ngjarja kishte ndodhur më 12 korrik 2025, rreth orës 20:55, në rrugën “Shala e Bajgorës” në fshatin Gojbulë, ku Fatmir Voca ishte qëlluar me armë zjarri derisa po ruante një pronë private, brenda një kontenieri të improvizuar për qëndrim.
I plagosuri kishte kërkuar ndihmë në Emergjencën e Vushtrrisë dhe më pas ishte transferuar në QKUK në Prishtinë, ku kishte vazhduar trajtimin nën përcjellje policore.
Në vendin e ngjarjes, hetuesit kishin gjetur gjurmë gjaku, xhama të thyer dhe dy gëzhoja të armës së gjatë, që dyshohet se janë përdorur në sulm. Fillimisht nuk kishte as të arrestuar dhe as dëshmitarë.
Pas një pune hetimore, policia kishte arritur të identifikojë tre persona të dyshuar: Festim Ademi, Lirigzon Ademi dhe Fitim Ademi, për të cilët ishin kryer bastisje në disa lokacione në Gojbulë, por pa rezultat konkret në atë fazë.
Njëri prej tyre ishte ndaluar më 14 korrik 2025 dhe ishte dërguar në paraburgim, ndërsa dy të tjerët kishin mbetur në arrati dhe ishin shpallur në kërkim.
Rasti ka marrë kthesë të re më 24 prill 2026, kur njëri nga të dyshuarit kryesorë është ekstraduar nga Gjermania në Kosovë, në bazë të një urdhër-arresti ndërkombëtar të lëshuar nga Gjykata Themelore në Mitrovicë.
I dyshuari është pranuar në Aeroportin Ndërkombëtar “Adem Jashari” rreth orës 00:25 dhe më pas është dorëzuar tek Policia në Vushtrri. Me urdhër të prokurorit, ndaj tij është caktuar masa e ndalimit për 48 orë.
Ndërkohë, dy të dyshuarit e tjerë vazhdojnë të jenë në kërkim policor.
Hetimet për këtë rast po vazhdojnë me intensitet, ndërsa autoritetet synojnë zbardhjen e plotë të motivit dhe rrethanave të kësaj ngjarjeje të rëndë.
