Një dokumentar i publikuar këtë të enjte hedh dritë mbi jetën dhe karrierën e Ronaldinjos, një prej futbollistëve më spektakolarë në historinë e sportit. Materiali përqendrohet jo vetëm tek arritjet e tij në fushë, por edhe tek episodet më të vështira jashtë saj, duke ndërtuar një portret të plotë të ish-yllit brazilian.
Kulmi i karrierës dhe të ardhurat rekord
Ronaldinjo, ish-lojtar i Brazilit dhe Barcelonës, fitues i Kupës së Botës në vitin 2002 dhe i “Topit të Artë” më 2005, konsiderohej ndër figurat më të suksesshme dhe më të paguara të futbollit botëror. Në vitin 2006, ai raportohet se u bë lojtari më i paguar në botë, duke tejkaluar edhe David Bekam.
Sipas dokumentarit, të ardhurat e tij ishin të konsiderueshme:
“France Football raportoi se Ronaldinjo fitonte mbi 18 milionë euro në vit nga paga dhe sponsorizimet”.
Ai kishte kontrata me marka të mëdha ndërkombëtare si Nike, Pepsi dhe Coca-Cola, duke konsoliduar statusin e tij si ikonë globale.
Rënia financiare dhe problemet ligjore
Pavarësisht fitimeve të mëdha, dokumentari thekson se gjendja financiare e Ronaldinjos nuk ka qenë e qendrueshme. Në vitin 2018, u raportua se ai kishte vetëm 6 euro në llogaritë bankare, si pasojë e borxheve dhe problemeve ligjore.
Një vit më vonë, më 2019, autoritetet braziliane sekuestruan 57 prona të tij për shkak të detyrimeve tatimore të papaguara. Këto zhvillime nxjerrin në pah kontrastin mes pasurisë së krijuar dhe menaxhimit të saj.
Megjithatë, sipas vlerësimeve aktuale, pasuria e tij ka arritur mbi 72 milionë euro, kryesisht nga sponsorizimet dhe aktivitetet mediatike.
Arrestimi në Paraguaj dhe përvoja në burg
Një nga episodet më të bujshme në jetën e Ronaldinjos ndodhi në mars të vitit 2020, kur ai dhe vëllai i tij u arrestuan në Paraguaj për përdorim dokumentesh të falsifikuara.
Gjatë qendrimit në paraburgim, ish-futbollisti u shpreh:
“Unë kurrë nuk e kam imagjinuar se do të përjetoja një situatë të tillë”, duke shtuar se gjithmonë kishte synuar të sillte gëzim për njerëzit me futbollin e tij”.
Fillimisht ai qendroi 32 ditë në burg, përpara se të transferohej në një hotel në Asunción, ku vijoi procesi ligjor. Gjatë kësaj periudhe, ai festoi edhe ditëlindjen e 40-të në kushte paraburgimi.
Raportohet se gjatë kohës në burg, Ronaldinjo fitoi simpati mes të burgosurve dhe mori pjesë në një turne futsali, ku skuadra e tij fitoi finalen me rezultatin 11-2. Pas lirimit, ai dhe vëllai i tij u gjobitën me rreth 170 mijë euro në total.
