Shkruan Ismet Haziri
Zgjedhjet e fundit në Hungari dhanë një mesazh të fortë: pushteti absolut nuk është i përjetshëm, dhe propaganda nuk mund ta zëvendësojë realitetin. Edhe aty ku dukej se gjithçka ishte e kontrolluar, qytetarët treguan se ekziston një kufi – një vijë e kuqe që nuk kalohet më.
Ky është një moment reflektimi për të gjithë rajonin tonë.
Sepse problemi nuk është vetëm te liderët populistë, por te vetëdija e elektoratit. Aty ku nuk ka ndryshim real, aty ku premtimet përsëriten dhe jeta nuk përmirësohet, aty ku retorika bëhet më e fortë se rezultatet – duhet të kuptojmë se po mashtrohemi.
Populizmi ushqehet me emocione, me frikë dhe me nacionalizëm të zhurmshëm. Por qytetarët sot, sidomos të rinjtë, kërkojnë diçka tjetër: zhvillim, dinjitet, mundësi dhe një të ardhme të prekshme.
Koha e folklorit politik po mbaron.
Nëse nuk kërkojmë llogari, nëse nuk refuzojmë gënjeshtrat e përsëritura, atëherë bëhemi pjesë e problemit. Ndryshimi nuk fillon nga liderët – fillon nga vetëdija jonë si votues.
Zgjohu. Mendo. Voto me përgjegjësi.
