Pas zbulimit të rezultateve të testeve të drogës, ku u përfshinë disa të famshëm, mes tyre edhe aktorja Hande Erçel, një tjetër emër i njohur i ekranit turk ka reaguar. Aktorja Hafsanur Sancaktutan ka mohuar kategorikisht përdorimin e lëndëve narkotike, pasi raportet e mjekësisë ligjore e nxorën atë pozitive.
Ngjarja vjen pas një hetimi të fundit për substancat e ndaluara, të zhvilluar nën drejtimin e Zyrës së Kryeprokurorit Publik të Stambollit, ku u lëshuan urdhër-arreste për disa personazhe publike. Mes të ndaluarve si pjesë e këtij operacioni ishin aktorja Sinem Ünsal, këngëtari Emir Can İğrek, aktorja Hafsanur Sancaktutan dhe Ogün Alibaş. Nga të dyshuarit u morën menjëherë mostra gjaku, urine dhe flokësh për të kryer analizat e thelluara.
Instituti i Mjekësisë Ligjore përfundoi analizat dhe publikoi raportin zyrtar, i cili tregoi se këngëtari Emir Can İğrek, aktorja Hafsanur Sancaktutan dhe Ogün Alibaş rezultuan pozitivë. Sipas ekspertizës mjekësore, në mostrat e flokëve të këtyre tre individëve u gjetën gjurmë kokaine dhe metabolitësh të lidhur me të.
Menjëherë pas daljes së rezultateve në media, aktorja Hafsanur Sancaktutan ka bërë një deklaratë zyrtare në llogaritë e saj në rrjetet sociale. Ajo theksoi se ndihet thellësisht e tronditur dhe e trishtuar, duke e cilësuar të gjithë këtë situatë si një keqkuptim të madh dhe duke paralajmëruar se do të kërkojë një ritestim nga autoritetet për të zbardhur të vërtetën.
Në reagimin e saj, aktorja u shpreh e vendosur: “Nuk e kam parë dhe as nuk e kam përdorur absolutisht kurrë gjatë gjithë jetës sime substancën e ndaluar që përmendet në lajme. Do të kërkoj një test të përsëritur nga autoritetet zyrtare të Republikës së Turqisë. Jam e sigurt se ka ndodhur një keqkuptim dhe jam e gatshme të bëj gjithçka që është e nevojshme për ta vërtetuar këtë. Jam shumë e befasuar dhe shumë e mërzitur.”
