Kreatina nuk është më një suplement i kufizuar vetëm për sportistët e palestrës. Sipas raportimeve të Wall Street Journal, përdorimi i saj është rritur ndjeshëm, i nxitur nga rrjetet sociale dhe dëshmitë online, duke tërhequr një publik të gjerë – nga adoleshentë që kërkojnë performancë më të mirë sportive deri te gra në menopauzë.
Kreatina është një substancë natyrale që prodhohet nga organizmi dhe gjendet kryesisht në muskuj dhe tru. Ajo shndërrohet në fosfokreatinë, e cila furnizon muskujt me energji gjatë aktivitetit intensiv. Trupi ka nevojë për rreth 2 gramë në ditë dhe zakonisht e prodhon vetë, ndaj nuk ka rekomandime zyrtare për suplementim rutinë.
Studime të fundit sugjerojnë se përveç rritjes së forcës dhe masës muskulore, kreatina mund të ndihmojë edhe në funksionin e trurit. Një studim gjerman i vitit 2024 tregoi se një dozë e lartë (15–20 gramë) përmirësoi përkohësisht përpunimin njohës dhe reduktoi lodhjen pas mungesës së gjumit. Megjithatë, ekspertët paralajmërojnë se doza të tilla duhet të merren vetëm me këshillë mjekësore, pasi mund të rëndojnë veshkat.
Sipas Mayo Clinic, kreatina konsiderohet përgjithësisht e sigurt për të rritur të shëndetshëm kur përdoret në doza të kontrolluara dhe për periudha të kufizuara. Ka prova të forta për përfitimet në rritjen e forcës, rikuperimin pas stërvitjes dhe ruajtjen e masës muskulore në moshë të avancuar. Ka gjithashtu indikacione se mund të ndihmojë në ruajtjen e densitetit kockor dhe të ketë efekte të moderuara mbrojtëse për sistemin kardiovaskular, por këto të dhëna mbeten në studim.
Kreatina gjendet kryesisht në mish të kuq dhe peshk, ndërsa mungon në ushqimet bimore, çka bën që vegjetarianët dhe veganët të kenë nivele më të ulëta.
Ekspertët theksojnë se, megjithëse kreatina nuk është “substancë mrekullie”, ajo mbetet një nga suplementet më të studiuara dhe me përfitime të dokumentuara, me kusht që të përdoret me kujdes dhe nën mbikëqyrje profesionale.
