Ismail Tasholli nga platforma “Liria ka Emër” ka bërë të ditur se në marshin qytetar “Drejtësi, jo politikë” nuk do të ketë folës partiak.
Gjatë konferencës së sotme për media, Tasholli sqaroi se qytetarëve do t’u drejtohen pesë persona nga kategori të ndryshme të shoqërisë, të cilët do të përcjellin mesazhe qytetare pa përfshirje politike.
“E ripërsëris edhe sot: asnjë folës nuk do të jetë partiak. Ky është marsh qytetar,” ka thënë Tasholli.
Ai gjithashtu bëri të ditur se programi i marshit do të përfshijë performanca artistike nga Ilir Shaqiri dhe Lyrical Son, ndërsa do të realizohet një aksion simbolik tek monumenti NEWBORN, si një moment reflektimi mbi lindjen e shtetit të Kosovës dhe përgjegjësinë për mbrojtjen e së vërtetës së tij.
“Janë qindra autobusë që do të nisen në mënyrë të organizuar drejt Prishtinës. Agjenda do të publikohet në faqen zyrtare të platformës ‘Liria ka Emër’, në mënyrë që çdo qytetar të ketë informacion të saktë,” deklaroi Tasholli.
