Konflikti i fundit në Lindjen e Mesme ka hyrë në ditën e gjashtë, ndërsa sulmet ajrore dhe goditjet me raketa janë raportuar në një numër të madh vendesh të rajonit.
Sipas të dhënave të përmbledhura nga CNN, dhjetëra sulme janë regjistruar që nga fillimi i operacioneve ushtarake, kur Shtetet e Bashkuara dhe Izraeli nisën goditje ndaj objektivave ushtarake dhe qeveritare iraniane më 28 shkurt.
Harta e publikuar tregon se Irani është objektivi kryesor i sulmeve, me dhjetëra goditje të raportuara në qytete dhe baza ushtarake në të gjithë vendin, përfshirë edhe zonën përreth Teheranit.
Në të njëjtën kohë, sulmet dhe incidentet janë raportuar edhe në vende të tjera të rajonit. Në Liban, Izraeli ka goditur objektiva të lidhura me Hezbollah, ndërsa në Irak dhe Siri janë regjistruar gjithashtu sulme ndaj bazave dhe infrastrukturës ushtarake.
Harta e konfliktit
Tensionet janë shtrirë edhe në Gjirin Persik, ku janë raportuar incidente në Bahrein, Kuvajt, Emiratet e Bashkuara Arabe dhe Oman. Në disa raste janë përdorur raketa dhe dronë, ndërsa sistemet e mbrojtjes ajrore të vendeve të rajonit kanë ndërhyrë për të interceptuar kërcënimet.
Ndër zhvillimet e fundit të raportuara janë edhe sulme ndaj objekteve energjetike, përfshirë një rafineri nafte në Bahrein dhe një tanker nafte pranë brigjeve të Omanit.
Gjithashtu janë raportuar incidente edhe në Arabinë Saudite dhe Katar, ndërsa një bazë ajrore britanike në Qipro është përfshirë në një incident me dron.
Sipas analizave të ekspertëve të sigurisë, shpërndarja e sulmeve në një zonë kaq të gjerë tregon se konflikti po kalon nga një përplasje dypalëshe në një krizë rajonale, me ndikime në sigurinë, energjinë dhe transportin detar në Lindjen e Mesme.
Ndërkohë, komuniteti ndërkombëtar po paralajmëron se zgjerimi i mëtejshëm i luftës mund të ketë pasoja të mëdha për stabilitetin global, veçanërisht për tregjet e energjisë dhe rrugët kryesore të furnizimit me naftë.
