Prokuroria Themelore në Gjakovë ka nisur hetimet lidhur me dyshimet për manipulim të votave në Komunën e Malishevës, pasi disa kandidatë rezultuan të kenë përfituar qindra vota më shumë.
Prokuroria ka autorizuar Policinë e Kosovës që të ndërmarrë të gjitha veprimet e nevojshme në komunë, duke përfshirë:
Identifikimin e personave përgjegjës,
Grumbullimin e informatave,
Sigurimin e provave relevante, të cilat lidhen me dyshimet për manipulim të votave për kandidatë për deputet të Kuvendit të Kosovës.
Në njoftimin për media, Prokuroria thekson se mbetet e angazhuar në mbrojtjen e votës së lirë të qytetarëve dhe do të trajtojë çdo rast të dyshuar, me synimin e ruajtjes së integritetit të procesit zgjedhor dhe sundimit të ligjit.
Prokuroria Themelore në Gjakovë po monitoron gjithashtu nga jashtë procesin e rinumërimit të rezultateve zgjedhore, në kuadër të kompetencave të saj ligjore.
