Sokol Havolli nga Lidhja Demokratike e Kosovës ka deklaruar se LDK-ja nuk do të japë votën për rizgjedhjen e Vjosa Osmanit në postin e presidentes së vendit.
Sipas tij zgjedhja e presidentit kërkon konsensus të gjerë politik, duke rikujtuar se Osmani kishte marrë mbështetjen e LDK-së pesë vjet më parë me marrëveshje të përgjithshme politike, me pritjen që ajo të përfaqësonte unitetin e vendit.
“Ne e dimë se ajo ka përfaqësuar më shumë interesat e Lëvizjes Vetëvendosje. Në këto rrethana, LDK-ja nuk ndjen asnjë detyrim që ta votojë. Nëse Vetëvendosje vendos ta çojë Kosovën sërish në zgjedhje për shkak të karriges së Vjosa Osmanit, kjo nuk është përgjegjësi e LDK-së, por e Vetëvendosjes”, tha Havolli.
Ai ka shtuar se LDK-ja nuk heq dorë nga ambicia për t’u rikthyer si partia e parë në vend.
