Kryeministri në detyrë i Kosovës, Albin Kurti, gjatë ceremonisë së përurimit të Urës së Ibrit në Mitrovicë, theksoi se qëndrimi i tij ndaj qasjes së urave mbi këtë lum mbetet i njëjtë: ato duhet të jenë të hapura për të gjithë qytetarët.
“Në çdo takim me partnerët ndërkombëtarë, ne e përsërisim vazhdimisht qëndrimin tonë se ura duhet të jetë e hapur. Kemi gjithsej 77 ura mbi lumin Ibër, disa prej tyre shtrihen edhe në Mal të Zi dhe Serbi. Në urën kryesore ka persona që nuk duhet të jenë pjesëtarë të KFOR-it, dhe këtë duhet ta zgjidhim përmes dialogut dhe bisedave të hapura,” deklaroi Kurti.
Ai shtoi se prioritet mbetet lehtësimi i shkëmbimit tregtar dhe lëvizja e lirë e qytetarëve. “Urat mbi Ibër janë të Mitrovicës dhe të mitrovicasve,” theksoi kryeministri në detyrë, duke i bërë thirrje për mirëkuptim dhe bashkëpunim në menaxhimin e tyre.
Ceremonia e përurimit të urës u zhvillua në një atmosferë festive, ku qytetarët patën mundësi të shohin nga afër investimin që synon të lehtësojë komunikimin dhe transportin në rajon.
