Retorika e Kremlinit po bëhet gjithnjë e më e rrezikshme. Zyrtarët rusë kanë rritur ndjeshëm tonet dhe paralajmërimet ndaj Perëndimit, duke bërë publike plane të supozuara për një përballje bërthamore me Shtetet e Bashkuara dhe Mbretërinë e Bashkuar. Moska nuk e fsheh më faktin se ka hartuar objektiva strategjikë në rast të një lufte të përgjithshme globale, dhe sipas të gjitha shenjave, ky nuk është më vetëm një skenar propagandistik.
Një ndër zërat më të njohur të linjës së ashpër në Rusi, ish-zv.kryeministri Dmitry Rogozin, ka publikuar një listë me 23 objekte britanike që, sipas tij, do të ishin të parat që do të goditeshin nëse Rusia vendos të përgjigjet me armë bërthamore. Bëhet fjalë për qendra prodhimi armësh, baza ushtarake dhe struktura të infrastrukturës mbrojtëse.
Por kërcënimi nuk ndalet tek Britania. Në skenarët që qarkullojnë prej vitesh në mediat ruse, përfshihen edhe objektiva në SHBA: ndërtesa të nivelit të lartë si Pentagoni, kampi presidencial në Camp David, baza të mbyllura ushtarake, dhe qendra komunikimi strategjike. Ato paraqiten si pika të mundshme goditjeje brenda vetëm pak minutash, përmes raketave hipersonike ruse.
Rusia e sheh veten të rrethuar nga një rreth perëndimor, që sipas saj ka tejkaluar çdo kufi me mbështetjen ndaj Ukrainës, zgjerimin e NATO-s dhe sanksionet e shumta ekonomike. Në këtë klimë tensioni, harta e objektivave nuk është thjesht një mesazh imagjinar, por një demonstrim i vullnetit të Kremlinit për të përshkallëzuar situatën, nëse e sheh të nevojshme.
Në thelb, bëhet fjalë për një luftë nervash. Rusia përpiqet të projektojë frikë, të krijojë panik dhe të imponojë një status quo me anë të kërcënimit bërthamor. Por kjo taktikë sjell një tjetër realitet të rrezikshëm: normalizimin e diskursit për luftën bërthamore dhe zbehjen e vijave të kuqe ndërkombëtare.
