Pas propozimit nga dega e LDK-së në Suharekë, Flamur Bytyçi njofton kandidaturën e tij për zgjedhjet parlamentare të 28 dhjetorit, duke theksuar përkushtimin ndaj qytetarëve dhe traditës familjare.
Flamur Bytyçi, djali i Ukë Bytyçit, ish-kryetar i Suharekës nga radhët e LDK-së dhe ish-komandant i UÇK-së, ka njoftuar kandidaturën e tij për deputet në zgjedhjet parlamentare të 28 dhjetorit.
“Të dashur miq dhe familjarë, të respektuar qytetarë të Suharekës, sot dua ta ndaj me ju një vendim të rëndësishëm për angazhimin tim politik. Pas propozimit nga Dega e LDK-së në Suharekë, e pranoj me përgjegjësi dhe mirënjohje kandidaturën time për deputet.
E konsideroj privilegj dhe nder të jem në të njëjtën listë me gra dhe burra të ndershëm të Lidhjes Demokratike të Kosovës, njerëz me histori, integritet dhe përkushtim për shtetin tonë. Besoj fuqishëm se koha e LDK-së është rikthyer. Besoj po aq fuqishëm se nën udhëheqjen e kryetarit Lumir Abdixhiku, LDK do t’i fitojë këto zgjedhje dhe do t’i japë vendit stabilitetin dhe zhvillimin që meriton.
Jam mirënjohës për secilin qytetar që më ka vlerësuar dhe përkrahur deri sot. Kjo më obligon edhe më shumë të punoj me ndershmëri, me qetësi dhe me përkushtim të plotë për Republikën tonë dhe për Suharekën tonë,” shkruan Flamur Bytyçi.
