Kryeministri në detyrë dhe lideri i Lëvizjes Vetëvendosje, Albin Kurti, mori pjesë në Këshillin e Internacionales Socialiste, i cili u mbajt në Maltë. Gjatë këtij takimi, u diskutua për sfidat globale të paqes, demokracisë, drejtësisë sociale dhe ndryshimeve klimatike.
Kryeministri Kurti mbajti një fjalim për delegacionet e pranishme, ku theksoi rëndësinë e të drejtave të njeriut dhe sundimit të ligjit. Ai shpjegoi se lufta e tij kundër korrupsionit ka ndihmuar në rritjen ekonomike, ndërsa politikat sociale të rishpërndarjes kanë kontribuar në zhvillimin progresiv të vendit.
Lëvizja Vetëvendosje theksoi se pjesëmarrja e Kurtit në këtë forum ndërkombëtar përforcon angazhimin e Kosovës në organizatat progresive globale dhe promovimin e paqes, lirisë, solidaritetit dhe drejtësisë.
Në takimin e Këshillit morën pjesë gjithashtu krerë të lartë të qeverive, përfshirë kryeministrin e Maltës, Robert Abela, si nikoqir, dhe kryeministrin e Spanjës, Pedro Sánchez, i cili është gjithashtu kryetar i Internacionales Socialiste. Ata diskutuan për dinamikat globale, sidomos ato në Mesdhe, dhe rolin e Internacionales Socialiste në këtë kontekst.
