Një ngjarje e rëndë është raportuar mëngjesin e djeshëm në Prizren, ku një grua 44-vjeçare është gjetur pa shenja jete në një shtëpi të pabanuar në rrugën “Alpet Shqiptare”.
Sipas të dhënave nga strukturat e afërta me hetimin, rasti është raportuar rreth orës 08:00. Patrulla policore ka dalë menjëherë në vendngjarje dhe ka kontaktuar me ekipin e urgjencës, i cili ka konstatuar vdekjen e viktimës, e identifikuar me inicialet F. A., rreth 44-vjeçare.
Një person që ndodhej në vendin e ngjarjes, ka dhënë deklaratën fillestare për identifikimin e viktimës. Sipas informacioneve të para, e ndjera ishte e njohur për Policinë e Kosovës për shkak të përdorimit të substancave narkotike, ndërsa rrethanat e vdekjes mbeten ende të paqarta.
Në vendngjarje kanë dalë njësitë hetimore lokale dhe rajonale, të cilat kanë siguruar pamjet, provat dhe deklaratat e nevojshme.
Me urdhër të Prokurorit të Shtetit, rasti është iniciuar si “Hetim i vdekjes”, ndërsa trupi i pajetë është dërguar në Institutin e Mjekësisë Ligjore për obduksion.
Hetimet vazhdojnë për të sqaruar shkaqet dhe rrethanat e ngjarjes.
