Një ngjarje e rëndë ka ndodhur dje, rreth orës 13:30 në lagjen “Bajram Curri” në Prizren, ku një punëtor ka humbur jetën pasi ka rënë nga skeletet e një ndërtese në ndërtim.
Viktima është identifikuar si Faik Mehmetaj, 34-vjeçar nga fshati Caravik i Malishevës.
Lamtumira e fundit e 34-vjeçarit do të bëhet sot, në orën 16:00, në varrezat e fshatit Caravik.
Lidhur me rastin, N.B., pronar i kompanisë ndërtimore, është ndaluar për 48 orë me vendim të Prokurorit të Shtetit, nën dyshimin për veprën penale “Asgjësimi, dëmtimi apo heqja e pajisjeve dhe rrezikimi në vendin e punës”.
