Uragani Melissa ka arritur fuqinë maksimale të kategorisë 5 dhe po godet brigjet e Xhamajkës me erëra shkatërruese deri në 185 milje në orë (rreth 297 km/orë), duke u renditur si stuhia e dytë më e fortë në historinë e Atlantikut.
Sipas Qendrës Kombëtare të Uraganeve të SHBA (NHC), presioni në qendër të uraganit ka zbritur në 892 milibarë, një tregues i fuqisë ekstreme të stuhisë që po shkatërron gjithçka në rrugën e saj. Me këtë intensitet, Melissa qëndron menjëherë pas uraganit legjendar Allen (190 mph) të vitit 1980.
“Syri” i uraganit ka filluar të kalojë mbi territorin e Xhamajkës jugore, duke shënuar fillimin e zyrtar të zbritjes në tokë. Autoritetet paralajmërojnë se orët në vijim do të jenë “vendimtare dhe tejet të rrezikshme” për popullsinë.
Sipas raportimeve nga CNN dhe The Washington Post, erërat po rrëzojnë pemë, shtylla elektrike dhe ndërtesa në disa qytete bregdetare, ndërsa përmbytje të rënda janë regjistruar në Kingston, Port Royal dhe Black River.
Ekspertët parashikojnë reshje të jashtëzakonshme, me deri në 1000 mm shi në disa zona, çka pritet të shkaktojë rrëshqitje dheu dhe izolim të plotë të disa komuniteteve.
Valët e detit po arrijnë deri në 4 metra lartësi, ndërsa një stuhie e fuqishme detare (storm surge) po godet brigjet jugore të vendit.
Qeveria e Xhamajkës ka shpallur gjendje emergjente kombëtare dhe ka urdhëruar evakuimin e detyrueshëm në të gjitha zonat bregdetare dhe malore. Më shumë se 500 strehimore publike janë hapur në të gjithë vendin, ndërsa ushtria dhe shërbimet e shpëtimit po punojnë për të evakuuar qytetarët që kanë mbetur të bllokuar.
Kryeministri Andrew Holness paralajmëroi se vendi mund të përballet me “pasoja katastrofike” nëse uragani vazhdon me të njëjtin intensitet.
“Xhamajka nuk ka parë kurrë më parë një stuhi të kësaj përmase. Ne po përballemi me një provë të mbijetesës sonë kombëtare”, deklaroi ai në një komunikim të jashtëzakonshëm televiziv.
Raportimet e para flasin për të paktën tre viktima dhe dhjetëra të plagosur, ndërsa rreth 1.5 milionë persona janë pa energji elektrike.
Sipas Qendrës Kombëtare të Uraganeve, Melissa po lëviz drejt veri-verilindjes me rreth 11 km/orë, dhe pritet të godasë Kuban lindor brenda 24 orëve, përpara se të kalojë mbi Bahamet.
Agjencitë ndërkombëtare të ndihmës, përfshirë Kryqin e Kuq dhe Programin Botëror të Ushqimit, kanë mobilizuar fonde dhe ekipe emergjente për reagim të menjëhershëm sapo të kalojë rreziku i drejtpërdrejtë.
