Fatmir Sheholli është arrestuar të enjtën nga Policia e Kosovë nën dyshimet për sipunazh.
Mirëpo, dyshimet se Sheholli është bashkëpunëtor i Serbisë ishin edhe në të kaluarën.
Kësisoj në kohën e luftës, më 15 mars 1999, 44 familje ishin distancuar nga familja e Maliq Shehollit, thuhet në një tekst të gazetës “Bujku”.
Në këtë tekst thuhet se 44 familjarë “në pajtim me anëtarët e familjeve, përgjithmonë distancohen nga veprimet e Maliq e Fatmir Shehollit”.
Arsyeja e këtij distancimi ishin dyshimet se të dy kanë qenë në shërbim të pushtuesit serb në kohën e luftës në Kosovë.
Ndërkohë, Prokuroria Speciale e Kosovës ka dhënë detaje për arrestimin e Shehollit.
“Pas zhvillimit të hetimeve disa mujore, me urdhër të Prokurorisë Speciale të Kosovës, të enjten hetuesit policorë nga Drejtoria për Hetimin e Krimit të Organizuar dhe Krimeve të Rënda në Policinë e Kosovës kanë arrestuar F.SH., nën dyshimet për veprën penale “Spiunazh”.
I dyshuari F.SH., është arrestuar në regjionin e Prishtinës, nën dyshimin e bazuar se ka kryer veprën penale “Spiunazh”, nga neni 124 paragrafi 3 të KPRK-së. Operacioni i arrestimit është kryer edhe me asistencë të Agjencisë së Kosovës pë Inteligjencë.
Me aktvendim të Prokurorisë Speciale, i dyshuari është ndaluar për 48 orë, dhe nga njësitet relevante të Policisë së Kosovës janë duke u kryer bastisje në vendbanimin e të dyshuarit, me qëllim të sigurimit edhe të provave të tjera materiale.” – thuhet në njoftimin e tyre.
