Kandidati për Kryetar të Komunës së Vushtrrisë, Xhafer Tahiri, ka shpalosur paketën e tij thelbësore të mbështetjes për familjen, gjatë një takimi të mbajtur në lagjen “Jeton Tërstena”. I shoqëruar nga kandidati për asambleist, Arbër Hoxha, Tahiri u zotua se buxheti komunal do të përdoret për të lehtësuar barrën financiare të qytetarëve.
“Buxheti i Komunës do të kthehet te familja vushtrriase,” theksoi Tahiri, duke paraqitur katër pikat kryesore të programit të tij social:
Subvencionim i Banesës: Çiftet e reja do të mbështeten me subvencionim të normës së interesit deri në 7,000 € për blerje banese.
Fuqizimi i Grave: Çdo grua që dëshiron të kryejë trajnime profesionale për punësim do të subvencionohet me 300 € në muaj.
Kujdesi për Fëmijët: Komuna do të mbulojë plotësisht shpenzimet e logopedit dhe psikologut për fëmijët që kanë nevojë.
Çerdhet Private: Do të subvencionohet çmimi për familjet që dërgojnë fëmijët në çerdhe private.
