Presidenti i SHBA, Donald Trump, dhe presidenti ukrainas Volodymyr Zelenskyy u takuan në Nju Jork, duke dhënë deklarata të përbashkëta përpara mediave.
Trump e përshkroi homologun e tij ukrainas si “një burrë të madh” dhe e lavdëroi për rezistencën kundër agresionit rus.
“Ai po bën një luftë të jashtëzakonshme. Ne kemi shumë respekt për luftën që po bën Ukraina, është diçka e jashtëzakonshme,” tha Trump.
Në një moment, Trump i dha fjalën Zelenskyy-t për të folur mbi situatën ushtarake: “Do të donit të thoshit diçka mbi gjendjen në fushën e betejës?”.
I pyetur nga gazetarët nëse mendon që NATO duhet të rrëzojë avionët rusë që hyjnë në hapësirën ajrore të aleancës, Trump u përgjigj prerë: “Po, mendoj se duhet.”
Megjithatë, kur u pyet nëse SHBA do të mbështeste një akt të tillë, ai shtoi se kjo do të varej nga “rrethanat konkrete”.
Deklaratat vijnë pak ditë pasi Estonia raportoi shkeljen e hapësirës së saj ajrore nga tre avionë rusë MiG-31, të cilët qëndruan për 12 minuta brenda territorit para se të përziheshin nga avionë luftarakë italianë të NATO-s.
Një javë më herët, rreth 20 dronë rusë hynë në hapësirën ajrore të Polonisë, duke detyruar NATO-n të rrëzonte disa prej tyre dhe të forconte mbrojtjen e krahut lindor të Europës.
Nga ana e tij, presidenti ukrainas njoftoi se do ta informojë Trump mbi zhvillimet ushtarake. “Kemi lajme të mira nga fronti,” tha Zelenskyy, duke shtuar se bisedimet do të përfshijnë gjithashtu garancitë e sigurisë dhe mënyrat për të ushtruar presion të mëtejshëm ndaj Rusisë.
Takimi i Nju Jorkut u zhvillua në një klimë të ngrohtë mes dy liderëve, me mesazhe të qarta për mbështetje të mëtejshme të Ukrainës në përballjen me Moskën dhe gatishmëri të NATO-s për të reaguar ndaj çdo provokimi ajror rus.
