Me tingujt e këngës “Amazing Grace”, ceremonia përkujtimore për aktivistin Charlie Kirk filloi pak pas orës 20:00 në stadiumin State Farm.
Stadiumi është i mbushur plot. Më shumë se 200,000 njerëz janë të pranishëm për t’i dhënë lamtumirën e fundit Charlie Kirk, i cili u vra më 10 shtator, gjatë eventit “Prove Me Wrong Table”, në Universitetin Utah Valley, kur u qëllua me një snajper nga Tyler Robinson.
Pavarësisht faktit se ishte një ceremoni përkujtimore, atmosfera në stadiumin State Farm është gjithçka përveçse e pikëllueshme. Pjesëmarrësit kanë veshur kryesisht ngjyrat kombëtare të kuqes, të bardhës dhe blusë, siç është kërkuar nga organizatorët. E zeza pothuajse nuk ekziston.
Turma e mbledhur përfshinte një gamë të gjerë moshash, nga adoleshentët te të moshuarit, ndërsa shumë familje kanë sjellë me vete fëmijët e tyre.
Midis mijëra personave që marrin pjesë në funeralin e Charlie Kirk ishte edhe Elon Musk.
“Çdo vend në këtë stadium që nuk është i bllokuar nga sigurimi është i mbushur. Jam i nderuar që jam këtu”, shkroi Musk në X.
Ndërkohë, Steve Bannon drejtoi shfaqjen e tij “WarRoom” nga Stadiumi State Farm.
Musk dhe Kirk kishin luajtur role të shquara në fushatën zgjedhore të Donald Trump dhe në muajt e parë të administratës së tij, por manjati i teknologjisë nuk ishte shfaqur në evente publike me presidentin që nga ndarja e tyre shpërthyese qershorin e kaluar.
