Presidenti amerikan Donald Trump ndezi debate të forta të enjten, duke sugjeruar se Ukraina duhet të godasë direkt territorin rus për të pasur shanse në luftë. Deklarata e tij vjen në një kohë kur bisedimet e paqes janë bllokuar dhe lufta ka hyrë në vitin e tretë pa zgjidhje në horizont.
Në një postim në platformën e tij Truth Social, Trump shkroi: “Është shumë e vështirë, në mos e pamundur, të fitosh një luftë pa sulmuar vendin e pushtuesit. Është si një skuadër sportive që ka një mbrojtje të jashtëzakonshme, por nuk i lejohet të luajë në sulm. Nuk ka asnjë shans për të fituar! Kështu është edhe me Ukrainën dhe Rusinë”.
Ai shtoi më tej duke sulmuar presidentin aktual amerikan: “Joe Biden, i korruptuar dhe i paaftë, nuk e lejoi kurrë Ukrainën të luftonte, vetëm të mbrohej. Si përfundoi kjo? Gjithsesi, kjo është një luftë që nuk do të kishte ndodhur kurrë nëse unë do të isha president, ZERO shans. Kohë interesante po vijnë!!!”.
Retorika e Trump prek një pikë nevralgjike për Moskën, e cila e konsideron çdo mbështetje për sulme ukrainase në tokën ruse si “vijë të kuqe”.
Administrata Biden, deri në fund të vitit 2024, e kishte ndaluar Ukrainën të përdorte raketa me rreze të gjatë amerikane kundër Rusisë. Por pas presionit të aleatëve, Uashingtoni hoqi kufizimin. Menjëherë më pas, Kremlini ndryshoi doktrinën bërthamore, duke paralajmëruar se çdo sulm ndaj Rusisë i mbështetur nga një fuqi bërthamore do të trajtohej si sulm i përbashkët.
Vetëm disa ditë më vonë, Moska testoi raketën e re balistike ndërkontinentale me rreze të mesme, Oreshnik, duke goditur qytetin ukrainas të Dnipros. Rusia përdor rregullisht dronët e gjatë-distancë të Kievit kundër infrastrukturës energjetike dhe ushtarake si argument për ta portretizuar Ukrainën si “regjim terrorist”.
Paqe e bllokuar, sulme të reja ajrore
Deklaratat e Trump u publikuan në një moment kur Kremlini hodhi poshtë mundësinë e afërt të një takimi kokë më kokë mes presidentit rus Vladimir Putin dhe presidentit ukrainas Volodymyr Zelensky. Burime nga Moska sugjerojnë se Putin nuk ka dhënë ende asnjë pranim për një dialog të tillë, duke treguar se paqja është ende shumë larg.
Ndërkohë, Rusia kreu një seri të gjerë sulmesh ajrore gjatë natës mbi qytete të ndryshme të Ukrainës. Një prej raketave goditi një kompani prodhuese në pronësi amerikane, duke plagosur të paktën 15 persona.
Trump, mesazhe të koduara për Kremlinin
Menjëherë pas postimit të tij, Trump shpërndau një foto të vjetër me Putin, të vendosur mbi një imazh historik të vitit 1959, ku atëherë nënkryetari amerikan Richard Nixon shihej duke debatuar ashpër me liderin sovjetik Nikita Khrushchev.
Gjest i qartë i Trump për të treguar se është gati të rikthejë lojën e fortë diplomatike me Moskën, por gjithashtu një sinjal se mund ta përdorë luftën në Ukrainë si kartë politike për rikthimin e tij në pushtet. /Përshtatur nga “CNN”
