Presidenti i Shteteve të Bashkuara, Donald Trump ka urdhëruar vendosjen e tre anijeve luftarake në brigjet e Venezuelës për të luftuar trafikun e drogës, tha të mërkurën një burim i njohur me iniciativën.
Mediat amerikane raportuan këtë veprim, sipas të cilit presidenti synon të vendosë 4,000 marinsa në rajon për të luftuar kartelet, një pjesë e të cilave konsiderohen kërcënim për sigurinë e SHBA.
Sipas Reuters, anijet USS San Antonio, USS Iwo Jima dhe USS Fort Lauderdale, me 4,500 personel ushtarakë amerikanë, përfshirë 2,200 marinarë, pritet të mbërrijnë në zonë të dielën.
Përveç kësaj, të paktën tre anije të tjera luftarake, USS Gravely, USS Jason Dunham dhe USS Sampson, janë urdhëruar të lundrojnë në zonë. Këto janë shkatërrues me raketa të drejtuara të pajisura me sistemin Aegis, klasi Arleigh Burke.
Lëvizja vjen në një kohë ndërsa administrata Trump po rrit presionin mbi udhëheqësin venezuelian Nicolas Maduro, duke dyfishuar shpërblimin për arrestimin e tij në 50 milionë dollarë, që e akuzon për trafik droge.
Donald Trump ka lavdëruar luftën kundër trafikimit të drogës për të justifikuar një numër vendimesh spektakolare që ka marrë që nga kthimi në Shtëpinë e Bardhë në janar, nga tarifat ndaj Meksikës dhe Kanadasë deri te një valë arrestimesh të emigrantëve nga Amerika Latine.
Qeveria amerikane, e cila nuk e njeh fitoren të kontestuar nga opozita të Nicolas Maduros në zgjedhjet presidenciale të korrikut 2024 në Venezuelë, e akuzon atë si “kreun” e një “rrjeti ndërkombëtar të trafikimit të drogës”.
Uashingtoni e ka akuzuar Maduron se drejton bandën e trafikimit të kokainës Cartel de los Soles (Karteli i Diejve) me seli në Venezuelë.
Por Maduro e ka konsideruar si kërcënim këtë lëvizje të SHBA dhe për këtë arsye ka dislokuar 4.5 milionë trupa në të gjithë vendin, duke theksuar se “asnjë perandori nuk do ta prekë tokën e shenjtë të Venezuelës”.
Departamenti i Thesarit i SHBA-së e caktoi kartelin si një organizatë terroriste globale muajin e kaluar, duke e akuzuar atë për mbështetjen e grupit kriminal venezuelian Tren de Aragua dhe karteleve të drogës Sinaloa të Meksikës, të cilat u caktuan gjithashtu organizata terroriste të huaja në fillim të këtij viti.
“Presidenti Trump ka qenë shumë i qartë dhe konsistent, ai është i përgatitur të përdorë çdo element të fuqisë amerikane për të ndaluar vërshimin e drogës në vendin tonë dhe për t’i sjellë ata që janë përgjegjës para drejtësisë”, tha të martën Sekretarja e Shtypit e Shtëpisë së Bardhë, Karoline Leavitt.
E pyetur për mundësinë e veprimeve të forcave të armatosura amerikane në Venezuelë, ajo tha se Donald Trump do të përdorë “të gjitha mjetet” për të “parandaluar që droga të përmbytë SHBA”.
Garda kombëtare e vendit latino-amerikan u themelua nga ish-presidenti i ndjerë Hugo Chavez, trashëgimtari politik i të cilit konsiderohet Maduro. Sipas burimeve zyrtare, ajo ka rreth 5 milionë anëtarë, civilë ose rezervistë, dhe raporton te shtabi i përgjithshëm.
