Presidenti amerikan, Donald Trump, ka zbuluar motivin e tij të vërtetë për përfshirjen në ndërmjetësimin e përfundimit të luftës në Ukrainë: shqetësimin se mund të mos shkojë në parajsë pas vdekjes.
“Dua të përpiqem dhe të shkoj në parajsë, nëse është e mundur”, ka shpjeguar ai. “Po dëgjoj se nuk po punoj mirë… Por nëse shkoj në parajsë, kjo do të jetë një prej arsyeve”, ka thënë Trump, duke iu referuar përpjekjeve për arritjen e paqes në Ukrainë.
The New York Times vë në dukje se ky është një pohim tejet i pazakontë nga secili president, por duket veçanërisht i çuditshëm kur vjen nga Trumpi. Njeriu që shumë prej mbështetësve të tij e konsiderojnë profet, tani e pranon se nuk është shenjtor.
Është shumë e rrallë që Trump të flasë në këtë mënyrë, sidomos për vdekjen e tij. Ai është 79 vjeç dhe nuk preferon që kjo të përmendet. “Është një pikë kur nuk do të dëgjosh ‘Urime ditëlindjen’”, pati thënë ai kur mbushi 78 vjeç.
Në një konferencë më vonë të martën, zëdhënësja e Shtëpisë së Bardhë, Karoline Leavitt, u pyet nëse Trumpi po bënte shaka kur foli për parajsën.
“Mendoj se presidenti ishte serioz”, u përgjigj ajo.
“Mendoj se presidenti dëshiron të shkojë në parajsë – ashtu si të gjithë ne shpresojmë”.
