Kriza e heshtur në marrëdhëniet mes Serbisë dhe Rusisë ka shpërthyer publikisht pas deklaratës së ministrit serb të Integrimit Europian, Nemanja Starovic, i cili në një intervistë për median austriake APA u shpreh se Beogradi mund të jetë gati të vendosë sanksione ndaj Moskës pasi të anëtarësohet në Bashkimin Europian.
Reagimi nga Moska ishte i ashpër. Zëdhënësja e Ministrisë së Jashtme ruse, Maria Zakharova, tha në një deklaratë se lidershipi serb duhet të respektojë vullnetin e popullit të vet, i cili tradicionalisht është kundër sanksioneve ndaj Rusisë.
“Nëse qytetarët e Serbisë votojnë për ide që lidhen me marrëdhënie respekti, bashkëpunim të dobishëm reciprokisht me Rusinë, ruajtjen e komunitetit dhe kulturës sonë, zhvillimin e ndërlidhjeve dhe mosvendosjen e sanksioneve, atëherë udhëheqja serbe duhet të respektojë vullnetin e popullit serb. Ata sigurisht që nuk duhet t’i mashtrojnë qytetarët e tyre”, tha Zakharova.
Ajo kujtoi se edhe presidenti serb Aleksandar Vuçiç ka reaguar duke e quajtur deklaratën e ministrit Starovic “të pakujdesshme” dhe ka përsëritur se Beogradi nuk do ta ndryshojë pozicionin e tij për të mos iu bashkuar fushatës së sanksioneve kundër Rusisë.
Zakharova shtoi se deklaratat e tilla rrezikojnë marrëdhëniet e veçanta ruso-serbe dhe se “Serbia duhet të reflektojë mbi hapat që ndërmerr”.
“As nuk dua të hamendësoj se çfarë e shtyu ministrin e qeverisë serbe Staroviç të fliste për bashkimin e Beogradit me fushatën e paligjshme dhe të paligjshme të sanksioneve të Perëndimit kundër Rusisë, e cila është në kundërshtim me të drejtën ndërkombëtare. Sidomos pasi, siç kemi dëgjuar, kjo deklaratë tani është mohuar. Le të kuptojnë mes tyre se si janë të mundshme deklarata të tilla. Dhe, akoma më shumë, le të bëjnë një vlerësim të çdo hapi, të mundshëm apo të planifikuar, nëse ka”, përfundoi zëdhënësja.
Ky përplasje retorike është sinjal i qartë i presioneve të shumanshme mbi Beogradin, që ndodhet mes orientimit tradicional pro-rus dhe presionit të BE-së për të harmonizuar politikën e jashtme.
