Ambasada e Italisë në Kosovë ka mbështetur misionin e NATO-s në Kosovë, KFOR-in, i cili, në vlerësimin e Ambasadës, ka vepruar brenda kufijve të mandatit të tij në rastin e operacionit të kërkim-shpëtimit në Liqenin e Ujmanit, ku vdiq tragjikisht një person.
“Ambasada rithekson vlerësimin e saj të plotë për rolin pozitiv dhe afatgjatë që misioni i KFOR-it ka luajtur në Kosovë”, thuhet në komunikatë.
Mbështetje KFOR-it ka dhënë edhe ambasadori i Francës në Kosovë, Olivier Guerot. Sipas Guerot, Parisi zyrtar do të vazhdojë ta mbështes misionin e NATO-s në Kosovë, KFOR-in, me të gjitha kapacitetet e saja, sidomos, sipas tij, në një kontekst “ku dezinformimi dhe manipulimi i informacionit po bëhen sistematike”.
