Një 21-vjeçar ka vdekur si pasojë e një aksidenti që ka ndodhur mbrëmë rreth orës 22:00 në rrugën nacionale Prishtinë-Mitrovicë.
21-vjeçari që humbi jetën te rrethrrotullimi që po ndërtohet afër Pestovës është Ahmet Istrefi i cili pas plagëve të marra u nda nga jeta.
Istrefi ishte pjesë e Shoqatës për Kërkim Shpëtim, ku thuhet se dha një kontribut të madh në shërbim të komunitetit.
Shoqata njofton se detajet e varrimit do të bëhen të ditura me kohë nga familjarët e viktimës.
Postimi i plotë i Shoqatës për Kërkim Shpëtim:
“Me pikëllim të madh njoftojmë ndarjen nga jeta të papritur të Ahmet Istrefit (20.06.2003), anëtar i Shoqatës për Kërkim Shpëtim, i cili humbi jetën mbrëmë në një vetaksident. Ahmeti ishte një pjesëtar i përkushtuar dhe me zemër të madhe, i cili kontribuoi me përkushtim në shërbim të komunitetit tonë.
Detajet e varrimit do t’i bëjmë të ditura në kohë. Ngushëllime të sinqerta familjes, miqve dhe të gjithë atyre që e njohën Ahmetin. Qoftë i paharruar kujtimi i tij”.
