Një studim i ri i realizuar në Angli ka gjetur se 11 lloje të ndryshme kanceri po shfaqen gjithnjë e më shpesh tek të rinjtë, megjithëse arsyet e sakta të këtij trendi mbeten ende të paqarta.
Sipas studiuesve nga Instituti për Kërkime të Kancerit dhe Imperial College London, rritja e rasteve mund të lidhet pjesërisht me shtimin e mbipeshës dhe obezitetit, por ky faktor nuk e shpjegon plotësisht situatën.
Ndër kanceret që po rriten përfshihen ato të zorrës, tiroides, mëlçisë, veshkave, pankreasit, gjirit dhe vezoreve, si dhe disa forma të tjera më të rralla.
Ekspertët theksojnë se, ndonëse rastet po shtohen, kanceri tek të rinjtë mbetet relativisht i rrallë dhe se një stil jetese i shëndetshëm, aktiviteti fizik dhe shmangia e duhanit mund të ndihmojnë në uljen e rrezikut.
Shkencëtarët vijojnë kërkimet për faktorë të tjerë të mundshëm, përfshirë dietën moderne, ndotjen e ajrit, kimikatet dhe ndryshimet në mikrobiomën e zorrëve.
