Ministrat e Jashtëm të 25 vendeve perëndimore kanë dënuar ashpër Izraelin për “pikat e ndihmës me pikatore” në Rripin e Gazës, ndërsa Ministria palestineze e Shëndetësisë raportoi se mbi 1,000 persona janë vrarë që nga fundi i majit gjatë përpjekjeve për të marrë ndihmë humanitare.
Sipas OKB-së, shumica e viktimave ndodhën pranë qendrave të shpërndarjes së ndihmave të administruara nga Fondacioni Humanitar i Gazës (GHF), një strukturë e mbështetur nga SHBA dhe Izraeli, që filloi funksionimin më 27 maj. Autoritetet palestineze fajësojnë ushtrinë izraelite për shumicën e këtyre vrasjeve. Forcat Mbrojtëse të Izraelit (IDF) kanë pranuar se kanë qëlluar në ajër për paralajmërim në disa raste, por mohojnë përgjegjësinë për shumë incidente të tjera.
Në deklaratën e tyre, ministrat e Jashtëm thanë se “vuajtjet e civilëve në Gaza kanë arritur thellësi të reja”. Ata dënuan ashpër “modelin e ndarjes me pikatore të ndihmave” dhe vrasjet e civilëve, përfshirë fëmijë, që përpiqen të sigurojnë ushqim e ujë.
Vendet firmëtare përfshijnë: Australi, Austri, Belgjikë, Kanada, Danimarkë, Estoni, Finlandë, Francë, Islandë, Irlandë, Itali, Japoni, Letoni, Lituani, Luksemburg, Holandë, Zelandë e Re, Norvegji, Poloni, Portugali, Slloveni, Spanjë, Suedi, Zvicër dhe Mbretëria e Bashkuar. Deklaratës iu bashkua edhe komisioneri i BE për barazi dhe menaxhim krizash.
Vetëm në 24 orët e fundit, sipas autoriteteve shëndetësore palestineze, janë vrarë 99 persona dhe plagosur të paktën 650 të tjerë teksa përpiqeshin të merrnin ndihmë. Që nga fundi i majit, numri i përgjithshëm i të vrarëve gjatë kërkimit të ndihmave ka arritur në 1,021, ndërsa të plagosurit janë mbi 6,500. Bilanci total i viktimave që nga fillimi i luftës ka arritur në 59,029.
Mes 2 marsit dhe 21 majit, Izraeli bllokoi ndihmat për 11 javë, çka ka sjellë nivele ekstreme urie dhe kequshqyerjeje. Edhe sot, shumica e organizatave humanitare nuk lejohen të hyjnë në Gaza.
Ministrat e jashtëm theksuan se është “tronditëse” që kaq shumë civilë janë vrarë duke kërkuar ndihmë dhe kërkuan nga Izraeli që të respektojë ligjin ndërkombëtar humanitar dhe të lejojë hyrjen e ndihmave.
Nga ana tjetër, Ministria e Jashtme izraelite e hodhi poshtë deklaratën si “të shkëputur nga realiteti” dhe tha se ajo “dërgon sinjale të gabuara për Hamasin”, të cilin e fajësoi si përgjegjësin e vetëm për vazhdimin e luftës.
